Arghakhanchi Bulletin : The Fastest News Publisher from Nepal

प्रधानमन्त्रीले पार्टी फुटाउन अध्यादेश ल्याउन लागेको नेताहरुको आशंका

   
132   पटक पढिएको

काठमाडौं। प्रधानमन्त्री केपी शर्मा ओलीले पुनः पार्टी फुटाउन सहज हुनेगरी अध्यादेश ल्याउन लागेको नेकपाका नेताहरूले आंशका व्यक्त गरेका छन्। पार्टीमा विवाद चर्किरहेको बेला प्रधानमन्त्री ओलीले अध्यादेश ल्याउन लागेको नेकपामा चर्चा चलेको हो।

नेकपा स्रोतका अनुसार शीर्ष नेताहरुबीच उक्त विषयमा चर्चा भइरहेको छ। प्रधानमन्त्री ओली सत्तामा टिकिराख्ने र शक्तिशाली बन्ने दौडमा पुनः अध्यादेश ल्याउने तयारीमा रहेको स्रोतको भनाई छ। गत वैशाखमा पनि प्रधानमन्त्री ओलीले दल विभाजन र संवैधानिक परिषद् सम्बन्धी अध्यादेश ल्याएपछि पार्टीमा विवादले उग्ररुप लिएको थियो। त्यसयता नेकपा शीर्ष नेतृत्वमा देखिएको विवाद अझै समाधान हुन सकेको छैन।

नेकपाका महासचिव विष्णु पौडेलले आजै सामाजिक सञ्जालमा पार्टी एकता गम्भीर सङ्कटमा परेको बताएका छन्। उनले पार्टी एकताको रक्षाका लागि योगदान गर्न पनि आग्रह गरेका छन्। यति बेला पार्टी एकता गम्भीर संकटको मोडमा आइपुगेको उनको ठहर छ। नेतृत्व तहमा उत्पन्न अन्तर्विरोधले पार्टी एकताको औचित्य खण्डित हुन नसक्ने पनि पौडेलको भनाइ छ।

पछिल्लो समय मन्त्रिपरिषद् पुनर्गठन, राजदूतहरुको सिफारिस, कर्णालीका मुख्यमन्त्री महेन्द्रबहादुर शाही विरुद्ध अविश्वास प्रस्ताव, भारतीय गुप्तचर निकाय रअका प्रमुख सामान्तकुमार गोयलसँग प्रधानमन्त्री ओलीको भेट र पर्सा घटना लगायतका विषयमा पार्टी भित्र असन्तुष्टि बढेको छ। शनिबार दुई अध्यक्षबीच पार्टी भित्रको विवाद समाधानका लागि सचिवालय बैठक बोलाउने विषयमा छलफल भएको थियो।

पार्टीका निर्णयहरु प्रधानमन्त्री ओलीले लागू नगरेपछि पार्टी एकता संकटको विन्दुमा पुग्न थालेको नेकपाका नेताहरु बताउँछन्। पार्टीका निर्णय मान्ने हो भने नेकपा सकारात्मक दिशातिर अघि बढ्ने शीर्ष नेताहरुको भनाइ छ। पार्टी निर्णय नमान्ने हो भने झन् जटि हुँदै जाने नेताहरुको ठहर छ। पार्टी फुटाएर भएपनि प्रधानमन्त्री बन्ने ओलीको चाहनाले गर्दा पार्टी संकटमा भासिएको स्वयम नेकपाका नेताहरु बताउँछन्।

तपाईं हामीसंग फेसबुकट्वीटर मार्फत् पनि जोडिन सक्नुहुन्छ ।

तपाईको प्रतिक्रिया