गोपाल प्रसाद भट्टराई,अर्घाखाँची।अर्घाखाँचीको सन्धिखर्क–८,नेपालीचौरमा रहेको जनता आधारभुत विद्यालयको खाली जमिनमा आज वृक्षारोपण गरिएको छ । 

विद्यालयको आयोजना,सव–डिभिजन वन कार्यालय सन्धिखर्कको बिरुवा सहयोग र अभिभावकको सक्रियतामा बृक्षारोपण गरिएको हो । विद्यालयको हाताभित्र फैलिएको ३२ रोपनी मध्ये झन्डै १० रोपनी क्षेत्रफल भएको खाली जमिनमा वृक्षारोपण गरिएको विद्यालय व्यवस्थापन समितिका अध्यक्ष शिव प्रसाद पोख्रेलले जानकारी दिनुभयो ।

सन्धिखर्क–८ का वडा सदस्य देवी भुसाल,सामुदायिक वन उपभोक्ता महासंघका जिल्ला अध्यक्ष रामचन्द्र पोख्रेल,शिक्षक अभिभावक संघका अध्यक्ष चन्द्र प्रसाद बन्जाडे लगायत स्थानिय अभिभावक तथा सरोकारवालाको उल्लेखनिय उपस्थितिमा काठ तथा फलफुलजन्य करिब ४ सय बिरुवा रोपिएको विद्यालयका शिक्षक केशवराज पोखरेलले बताउनुभयो । 

कुनै समय विद्यार्थि अभावमा ढल्ने अवस्थामा पुगेको यो विद्यालय स्थानियको जागरुकता,विद्यालय प्रशासनको यथेस्ट कार्ययोजना र शिक्षकहरुको लगनशिलताले जिल्लाकै नमुना बनेको छ । कक्षा ५ बाट घटुवा भइ ३ मा झरेको स्कुलमा नेपाली र अग्रेजी दुवै माधयमबाट पठनपाठन सुरु भएपछि यो बर्षबाट कक्षा ६ संचालन गर्ने गरि योजना अगाडि बढेको प्रध्यानाध्यापक कमल प्रसाद गैरेले जानकारी दिनुभएको छ ।

कुनै समय ५ जना शिक्षकले ७ जना विद्यार्थिलाई पढाउनुपर्ने अवस्थाबाट प्रगति गर्दै आएको उक्त विद्यालयमा अहिले १ सय भन्दा धेरै विद्यार्थिले पढ्दै आएका छन् ।