१ असोज, काठमाडौं । नेकपा माओवादी केन्द्र पार्टीको तीन महिने विशेष रुपान्तरण अभियानबाट उत्साहित देखिएको छ।

माओवादी पार्टीजस्तो पनि रहेन भन्ने निष्कर्षसहित सुरु गरेको रुपान्तरण अभियानमा आफूले सरकारमा बसेर गरेका कामहरू जनतालाई सुनाउने, पार्टीप्रतिका गुनासा सुन्ने र आफूलाई रुपान्तरण गर्ने उद्देश्य राखेको थियो । अहिले पार्टीका अधिकांश नेता कार्यकर्ता वडा तहसम्म सक्रिय भएर अभियानमा लागेका छन् ।

माओवादी केन्द्रका उपाध्यक्ष तथा प्रचार विभाग प्रमुख अग्निप्रसाद सापकोटा १६ भदौदेखि सुरु भएको ‘जनतासँग माओवादी विशेष रूपान्तरण अभियान’ को पहिलो १५ दिन उत्साहजनक रहेको र पार्टीभित्रका अन्तरविरोधहरू हल हुँदै गएको दाबी गर्छन् ।

‘पार्टीभित्र देखिएका अन्तरविरोधहरू, जबसभित्र देखिएका अन्तरविरोध र मुक्तिमोर्चामा देखिएका अन्तरविरोधहरू क्रमश हल हुँदै गएका छन्’, सापकोटा भन्छन्, ‘ठूलठूला अन्तरविरोधमा हाम्रा जिम्मेवार कमरेडहरू सहभागी हुनुहुन्थ्यो । अहिले यो अभियानबाट ती सबै समस्याको हल हुँदै गएको छ । विद्यार्थीमा देखिएको समस्या हल भएर सबै नेता कार्यकर्ता काममा जाने परिस्थिति निर्माण भएको छ । यो सुखद पक्ष छ ।’

शान्ति प्रक्रियामा आएपछि आम नागरिकबाट छुट्दै गएको माओवादी सत्तादेखि सत्तासम्मको यात्रामा रुमलिएको देखिन्छ । यो बीचमा चुनाव जितेर सत्तामा पुग्नैका लागि माओवादी केन्द्रले ठूला दलहरू एमाले र कांग्रेससँग आलोपालो सम्झौता र सहकार्य गर्दै आइरहेको छ । संविधान निर्माणपछि सम्पन्न भएका दुईवटा आम निर्वाचनमा पहिलोपटक एमाले र दोस्रोपटक कांग्रेससँग गठनबन्धन बनाएर सत्तामा पुगेको माओवादीका लागि अब पुरानो प्रवृत्तिले काम गर्दैन भन्ने अनुभूति भएको देखिन्छ ।

१७ देखि २१ साउनमा राजधानीमा बसेको केन्द्रीय समितिको पूर्ण बैठकको निर्णयअनुसार माओवादीले आफ्नो नेतादेखि कार्यकर्तासम्मलाई अहिले गाउँगाउँमा पठाएको छ ।

केन्द्रीय समितिको हलमा अधिकांशले समस्या तल कार्यकर्तामा नभएर माथि नेतृत्व तहमा रहेको भन्दै असन्तुष्ट पोखेका थिए ।

माओवादी केन्द्र बाहिरबाट जनताबाट अलग हुँदै गएको र आन्तरिक रूपमा गुट उपगुटको राजनीतिले ओरालो लाग्दै गएको छ । यसलाई चिर्नका लागि पार्टी अध्यक्ष पुष्पकमल दाहाल प्रचण्ड विभिन्न अस्थायी जुक्ति निकालेर टालटुल पारिरहेका हुन्छन् । माओवादीले भोगेका पटक पटकको विभाजनपछि पार्टीभित्र केन्द्रदेखि क्षेत्रसम्म विभिन्न खालका गुटहरू घोषित अघोषित हिसाबले सञ्चालनमा छन् ।

यसपटक पार्टी केन्द्रीय समिति बैठकबाट त्यस्ता अन्तरविरोधलाई चिर्ने गरी नेताहरूका नयाँ जिम्मेवारीहरू तोकिएका छन् ।

जनतासँग प्रत्यक्ष भेटेर लिखित सुझावहरू केन्द्रीय कार्यालयलाई बुझाउन निर्देशन दिइएको छ । जसअनुसार अहिलेसम्म करिब ८० प्रतिशत वडामा अभियान पुगेको र बाँकी वडामा पनि छिट्टै प्रारम्भ गर्ने तयारी रहेको नेताहरू बताउँछन्
जस्तो कि मधेश प्रदेशमा लामो समयदेखि उपमहासचिवहरू मातृका यादव र गिरीराजमणि पोखरेलबीच विवाद छ । आन्तरिक गतिविधिदेखि आम निर्वाचनसम्म उनीहरूबीच जारी विवादका कारण पार्टी मधेशमा कमजोर बन्दै गएको गुनासो हुने गर्थ्यो। यसपटक पार्टीले उनीहरूलाई फरक-फरक प्रदेश कमिटीको जिम्मेवारीमा पठाएर मधेशमा लिलामणि पोखरेललाई पठाएको छ । यादवलाई कर्णाली प्रदेश र पोखरेललाई सम्पर्क विशेष प्रदेशको जिम्मेवारी दिइएको छ । जसका कारण यतिबेला मधेशमा विवाद मत्थर हुँदै गएको र पार्टी संगठनमा उत्साह थपिएको नेताहरूको बुझाइ छ ।

‘नेताहरूको विवादका कारण मधेशमा त माओवादी के हो के हो भन्ने अवस्थामा पुगेको थियो । अहिले अभियानका क्रममा यस्तो विवाद कम देखिएको छ’, मधेशको अभियानमा जोडिएका एक केन्द्रीय सदस्य भन्छन्, ‘तर अहिले मधेशमा आशा जागेको छ । हामीले कमजोरी सुधार्ने अवसरका बनाउन सक्ने देखिन्छ ।’

यस्तै पार्टीभित्र वडादेखि केन्द्रसम्म रहेका बलिया गुटको नेतृत्व गरिरहेका उपमहासचिवहरू जनार्दन शर्मा र वर्षमान पुनलाई एउटै भूगोलमा जिम्मेवारी तोकिएको छ । शर्मा बागमती प्रदेशको इन्चार्ज छन् भने पुन बागमती प्रदेशमै रहेका विशेष जिल्ला र काठमाडौँ, ललितपुर र भक्तपुर रहेको उपत्यका विशेष प्रदेशको इन्चार्ज छन् ।

हरेक दिनजसो शर्मा र पुन बागमती र विशेष प्रदेशका सम्पर्क कार्यालय रहेको निजामती कर्मचारी संगठनको भवन बबरमहल पुग्छन् । कहिले छुट्टाछुट्टै कहिले सामूहिक बैठकको आयोजना गर्छन् र संयुक्त हिसाबले योजना बनाएर अभियानमा हिँड्छन् ।

उनीहरूसँगै जिम्मेवारीमा रहेका माओवादी केन्द्रका एक जना वैकल्पिक केन्द्रीय सदस्य शर्मा र पुनबीच सम्बन्ध सुमधुर देखिन थालेको अनुभूति भएको बताउँछन् । ‘साच्चिकै तिक्तता सकिएको हो कि सकिएजस्तो गरेका हुन् थाहा छैन, तर फरक जिम्मेवारी भएपनि संयुक्त निर्णय गर्ने अवस्थामा हुनुहुन्छ भनेपछि मिलेकै भनेर बुझेका छौँ’, उनी भन्छन् ।

यसको अर्को उदाहरण हो, जनवर्गीय संगठनमा देखिएको विवाद । विद्यार्थी संगठन अखिल (क्रान्तिकारी) मा राष्ट्रिय सम्मेलनदेखि नै विवाद जारी छ । एकातिर पञ्चा सिंह नेतृत्वमा सम्मेलनबाट घोषणा गरेको कमिटी छ भने पवन कार्कीको संयोजकत्वमा अर्को समानान्तर संगठन सक्रिय छ । तर अभियान सञ्चालन पश्चात शर्मा र पुनकै सक्रियतामा विद्यार्थी संगठनको समस्या तत्कालका लागि हल भएको छ ।

दुवै पक्षका विद्यार्थी नेतालाई अध्यक्ष प्रचण्डसँग छलफल गराएर आगामी फागुनमा राष्ट्रिय सम्मेलन गर्ने निर्णय माओवादीले गरेको छ । उक्त बैठकमा शर्मासँग सल्लाह गरेरै पुनले भूमिका खेलेका थिए । उनकै उपस्थितिमा विद्यार्थी संगठनका दुवै पक्ष सहमत भएर अभियानमा खटिएका छन् ।

पार्टी उपाध्यक्ष तथा प्रवक्ता सापकोटा यही रˆतारमा अभियान अघि बढे तीन महिनामा अपेक्षा गरेभन्दा राम्रो नतिजा आउने बताउँछन् ।

‘पार्टी चलायमान, गतिशील भएको छ । जनमुखी हुँदै गएको छ । सरकारले गरेका दैनिक सेवा प्रवाह, सुशासन, भ्रष्टाचार नियन्त्रण र कानुन निर्माणमा गरेका कामको प्रचार पनि गर्ने र स्वामित्व पनि लिने कुरा भइरहेको छ’, उनी भन्छन्, ‘जनताको पहलकदमी बढाउने र सिर्जनशीलतालाई जनताकै हितमा परिचालन गर्ने, उत्साह र आत्मविश्वासलाई बढाउने भन्ने लक्ष्यमा अगाडि बढेका छौँ ।’

उनी यो अभियानमार्फत जनतामा गएर माओवादीले रुपान्तरणको सबभन्दा पहिलो काम आफैंलाई बदल्नु रहेको भन्दै त्यसमा सफल हुने बताए ।

अभियानका १५ दिन : कुन प्रदेशमा कस्तो ?

माओवादीले अभियानका सुरुवाती १५ दिनको नतिजा हेरी अपेक्षा भन्दा धेरै काम गर्न सकिने निष्कर्षमा पुगेको छ । पार्टी कोषाध्यक्ष तथा कार्यालय सचिव श्रीराम ढकाल अभियानका क्रममा उत्साह थपिएको बताउँछन् ।

‘अभियान सबै प्रदेशमा अत्यन्तै उत्साहजनक ढंगले अघि बढिरहेको छ । जनताबाट माओवादी पार्टी र नेताहरू बिगि्रएको भन्ने गुनासो छ । साँच्चै सच्चिन खोजेको भए हामी हेछौर्ँ भनेर विश्वास गर्न खोजेको देखिएको छ’, उनी भन्छन्, ‘जनताको सुझावलाई ग्रहण गर्दै रुपान्तरणका अभियानमा त्यसलाई करेक्सन गर्न पनि सुरु गरिएको छ ।’

ढकालले अभियानमा २५ लाख जनतासँग भेट्ने लक्ष्य राखेको भए पनि अहिले दुई हप्ता बित्दै गर्दा त्योभन्दा बढीसँग प्रत्यक्ष भेटघाट हुने देखिएको बताउँछन् । बागमतीमा मात्रै १३ वटा जिल्लाका १ लाखभन्दा बढी जनतासँग भेटघाट गरिसकेको उनको भनाइ छ ।

उनका अनुसार जनतासँग प्रत्यक्ष भेटेर लिखित सुझावहरू केन्द्रीय कार्यालयलाई बुझाउन निर्देशन दिइएको छ । जसअनुसार अहिलेसम्म करिब ८० प्रतिशत वडामा अभियान पुगेको र बाँकी वडामा पनि छिट्टै प्रारम्भ गर्ने तयारी रहेको उनले जानकारी दिए ।

कोशी

प्रदेशका ९८१ वडामा १६ भदौदेखि अभियान सुरु भइसकेको र बाँकी १७६ वडामा पुग्ने क्रममा छ । अभियानका क्रममा अन्य पार्टीबाट १२० जना माओवादी केन्द्रमा प्रवेश गरेका छन् ।
यस्तै अस्पताल सरसफाइ, आँखा शिविर, स्वास्थ्य शिविर, बैठक, प्रशिक्षण भएका छन् भने आउने ६ असोजमा कोशीका सबै वडामा एकै साथ ब्यानर प्रदर्शन गरेर सन्देश सभा गर्ने तयारी माओवादी केन्द्रको छ ।

मधेश

प्रदेशका ८ जिल्ला १३५ पालिकाका १२७१ वडामध्ये ९०० वडा अभियान पुगिसकेको माओवादीले जनाएको छ । बाँकीमा प्रारम्भको तयारी चलिरहेको छ । मधेशका सबै वडामा पार्टी केन्द्रीय सदस्यहरूलाई खटाइएको छ ।

बागमती

प्रदेशमा १३ वटा जिल्लाका ४४४ वटा सरसफाइ, बाटोघाटो निर्माण तथा मर्मतका काम र ८४ वटा सामुहिक अन्तरक्रिया र जन भेटघाटका काम भएको रिपोर्ट पार्टी कार्यालयमा छ ।
अभियानका क्रममा १ लाख ८ सय ८४ जनतासँग प्रत्यक्ष भेटघाट गरेर सुझाव लिइएको र १०४५ वटा संगठनका बैठकका भेला र संगठन सुदृढिकरणको काम गरेका छन् । यस्तै ५ हजार ५ सय ५० पार्टी सदस्यता नविकरण र २ सय जना पार्टी प्रवेश गरेका छन् ।

गण्डकी

प्रदेशका ३८६ वडामा अभियान सञ्चालन भइसकेको छ । मुस्ताङ र मनाङका केही वडामा बाटोको समस्याले गर्दा जान नसकिएको माओवादीको भनाइ छ । बाँकी वडामा पनि १५ दिनभित्र अभियान पुग्ने जनाइएको छ ।

लुम्बिनी

प्रदेशका १२ वटै जिल्लाका सम्पूर्ण वडामा एकैसाथ अभियान पुगेको छ ।

कर्णाली

प्रदेशमा ७१८ वटै वडामा टोल भेला, घरदैलो, शहीद बेपत्ता परिवार, घाइते, अपाङ्ग र पूर्व जनमुक्ति सेनाका परिवारसँग भेटघाट गरेको माओवादीले जनाएको छ । साथै, अन्य पार्टीका नेतासँग पनि सुझाव माग गरिएको र ५ सय ८८ जना विभिन्न पार्टीबाट प्रवेश गरेका पार्टी कार्यालयले जनाएको छ ।

सुदूरपश्चिम

प्रदेशमा ८० वटा टोली बनाएर वडामा अभियान सञ्चालन भएको छ । सुदूरपश्चिममा उत्पादनमा जोड दिइएको माओवादीले जनाएको छ ।

प्रवास

प्रवास कमिटी प्रदेश अन्तर्गत ३२ वटा देशमा रहेका नेपाली समुदायबीच अभियान पुगिसकेको छ । ‘जहाँ पुगौं, जहाँ बसौं- सपनामा नेपाल, जपनामा नेपाल’ भन्ने नारा बनाएर प्रवास रुपान्तरण अभियान सञ्चालन भइरहेको माओवादीको भनाइ छ ।

माओवादीले तीन महिने अभियानलाई तीनवटा चरणमा बाँडेको छ । जसअन्तर्गत पहिलो चरणका कार्यक्रमहरू उत्साहजन गरेको माओवादी केन्द्रको निष्कर्ष छ ।

पहिलो चरण : बैठक, भेला, प्रशिक्षण, सदस्यता नवीकरण/विस्तार, अभिलेख व्यवस्थापन, उत्पादन र प्रचारसँग सम्बन्धित संयन्त्र र योजना निर्माण, विभिन्न तहका पार्टीका कार्यालय व्यवस्थापन, पार्टीभित्रका अन्तरविरोधहरुको पहिचान र समाधानको पहल, कार्यकर्ता व्यवस्थापनको लागि कोष निर्माण ।

दोस्रो चरण : पाँच घण्टे अन्तरपार्टी स्कुल, विषयगत अन्तर्क्रिया, विषयगत तालिम, गोष्ठी, जनप्रशिक्षण, जनभेला, टोल टोलमा युवाभेला, स्थानीय स्तरका सरकारी तथा सामाजिक संघ संस्थाहरुसँग अन्तर्क्रिया ।

तेस्रो चरण : जनप्रदर्शन, जनसंघर्ष, जनसेवासहित जनपरिचालनका कार्यक्रम । सुशासन, समृद्धि र सामाजिक न्यायको अभियानमा जनसमर्थन र ऐक्यबद्धताका कार्यक्रम ।स्रोत - अनलाइन खबर